ILEGAN Kultur Elkartearen helburu nagusietako bat Ilarduia, Egino eta Andoingo Herri Inauteriak berreskuratzea eta mantentzea da, baita hiru herrien ondare aberats horri balioa ematea eta aintzat hartzea ere; era berean, kultur ondarea gordetzeko kezkarekin dabiltzanei gure neguko jaia ezagutarazi nahi diegu.

Horretarako, Ilarduia, Egino eta Andoingo Herri Inauteriak sustatu eta antolatzen ditu urtero ILEGANek, non hiru herrietako herritarrek parte hartzen duten, bai jaia berreskuratzeko lanetan, bai jaiaren antolaketan eta garapenean. Aipagarria da inguruko beste elkarte eta talde batzuen lankidetza.